Եվրոպայի խորհրդի անդամ պետությունները և 1950 թվականի նոյեմբերի 4-ին Հռոմում ստորագրված Մարդու իրավունքների և հիմնարար ազատությունների պաշտպանության մասին Կոնվենցիայի (այսուհետ՝ Կոնվենցիա) այլ Բարձր պայմանավորվող կողմերը՝ սույն Արձանագրության ստորագրողները,

հաշվի առնելով Կոնվենցիայի դրույթները, մասնավորապես՝ Մարդու իրավունքների եվրոպական դատարանը (այսուհետ՝ Դատարան) հիմնող 19-րդ հոդվածը,

նկատի ունենալով, որ խորհրդատվական կարծիք տալու Դատարանի իրավասության ընդլայնումը կխթանի Դատարանի և ազգային իշխանությունների միջև փոխգործակցությունը և դրանով կամրապնդի Կոնվենցիայի կիրառումը՝ սուբսիդիարության սկզբունքին համապատասխան,

հաշվի առնելով Եվրոպայի խորհրդի Խորհրդարանական վեհաժողովի 2013 թվականի հունիսի 28-ի թիվ 285 (2013) կարծիքը,

համաձայնեցին ներքոհիշյալի շուրջ.

1. Մեծ պալատի հինգ դատավորներից կազմված խորհուրդը կայացնում է խորհրդատվական կարծիք տալու մասին խնդրանքը բավարարելու կամ չբավարարելու մասին որոշում՝ Արձանագրության առաջին հոդվածին համապատասխան։ Դատավորների խորհուրդը պարտավոր է հիմնավորել խնդրանքի բավարարման ցանկացած մերժում։

2. Եթե խորհուրդը բավարարում է խնդրանքը, Մեծ Պալատը տալիս է խորհրդատվական կարծիք։

3. Վերոնշյալ դրույթներին համապատասխան՝ Խորհրդի և Մեծ Պալատի կազմի մեջ ex officio ընդգրկվում է այն Բարձր պայմանավորվող կողմի անունից ընտրված դատավորը, որին պատկանում է հայցող դատարանը կամ տրիբունալը։ Նման դատավորի բացակայության դեպքում, կամ եթե տվյալ դատավորը չի կարող մասնակցել քննությանը, Դատարանի Նախագահը տվյալ Բարձր պայմանավորվող կողմի նախապես ներկայացրած ցուցակից նշանակում է մեկ այլ անձի, որը դատավորի կարգավիճակով մասնակցում է քննությանը։

Եվրոպայի խորհրդի Մարդու իրավունքների հանձնակատարը և Բարձր պայմանավորվող կողմը, որին պատկանում է հայցող դատարանը կամ տրիբունալը, իրավունք ունեն ներկայացնել գրավոր դիտողություններ և մասնակցել նիստերին։ Ելնելով արդարադատությունը պատշաճ կերպով իրականացնելու շահերից՝ Դատարանի Նախագահը կարող է ցանկացած այլ Բարձր պայմանավորվող կողմի կամ անձի հրավիրել՝ նույնպես ներկայացնելու գրավոր դիտողություններ կամ մասնակցելու նիստերին։

1. Խորհրդատվական կարծիքները պետք է լինեն հիմնավորված։

2. Եթե խորհրդատվական եզրակացությունն ամբողջությամբ կամ մասամբ չի արտահայտում դատավորների միաձայն կարծիքը, ապա ցանկացած դատավոր իրավունք ունի ներկայացնելու հատուկ կարծիք։

3. Խորհրդատվական կարծիքն ուղարկվում է հայցող դատարանին կամ տրիբունալին և այն Բարձր պայմանավորվող կողմին, որին պատկանում է այդ դատարանը կամ տրիբունալը։

4. Խորհրդատվական կարծիքները ենթակա են հրապարակման։

Խորհրդատվական կարծիքները չեն կրում պարտադիր բնույթ։

Բարձր պայմանավորվող կողմերի հարաբերություններում սույն Արձանագրության 1-5-րդ հոդվածների դրույթները դիտվում են որպես Կոնվենցիայի լրացուցիչ հոդվածներ, և Կոնվենցիայի բոլոր դրույթները կիրառվում են համապատասխանաբար։

1. Սույն Արձանագրությունը բաց է Կոնվենցիայի Բարձր պայմանավորվող կողմերի ստորագրման համար, որոնք կարող են պարտավորություններ ստանձնելու կապակցությամբ իրենց համաձայնությունն արտահայտել՝

ա. ստորագրությամբ՝ առանց վավերացման, ընդունման կամ հաստատման մասին արված վերապահումների, կամ

բ. վավերացման, ընդունման կամ հաստատման ենթակա ստորագրությամբ՝ հետագայում վավերացնելով, ընդունելով կամ հաստատելով։

2. Վավերագրերը, ընդունման կամ հաստատման մասին փաստաթղթերն ի պահ են հանձնվում Եվրոպայի խորհրդի Գլխավոր քարտուղարին։

1. Սույն Արձանագրությունն ուժի մեջ է մտնում Կոնվենցիայի տասը Բարձր պայմանավորվող կողմերի կողմից 7-րդ հոդվածի դրույթներին համապատասխան, Արձանագրությամբ պարտավորված լինելու մասին իրենց համաձայնությունը հայտնելու օրվանից հետո՝ եռամսյա ժամկետի լրանալուն հաջորդող ամսվա առաջին օրը։

2. Ցանկացած Կոնվենցիայի Բարձր պայմանավորվող կողմի համար, որն Արձանագրությամբ պարտավորված լինելու իր համաձայնությունը հայտնում է հետագայում, Արձանագրությունն ուժի մեջ է մտնում 7-րդ հոդվածի դրույթներին համապատասխան Արձանագրությամբ պարտավորված լինելու իր համաձայնությունը հայտնելու օրվանից հետո՝ եռամսյա ժամկետի լրանալուն հաջորդող ամսվա առաջին օրը։

Սույն Արձանագրության դրույթների նկատմամբ Կոնվենցիայի 57- րդ հոդվածով նախատեսված վերապահումներ չեն թույլատրվում։

Կոնվենցիայի յուրաքանչյուր Բարձր պայմանավորվող կողմ ստորագրելիս կամ վավերագիրը, ընդունման կամ հաստատման մասին իր փաստաթղթերն ի պահ հանձնելիս պետք է Եվրոպայի խորհրդի Գլխավոր քարտուղարին հղած հայտարարությամբ նշի այն դատարանները կամ տրիբունալները, որոնց նշանակում է սույն Արձանագրության 1-ին հոդվածի 1-ն կետի նպատակներով։ Այդ հայտարարությունը կարող է հետագայում փոփոխվել նույն կարգով։

Եվրոպայի խորհրդի Գլխավոր քարտուղարը Խորհրդի անդամ պետություններին և Կոնվենցիայի այլ Բարձր պայմանավորվող կողմերին ծանուցում է՝

ա. ցանկացած ստորագրման մասին,

բ. վավերագիրը, ընդունման կամ հաստատման փաստաթուղթն ի պահ հանձնելու մասին,

գ. 8-րդ հոդվածին համապատասխան՝ սույն Արձանագրության ուժի մեջ մտնելու օրվա մասին,

դ. 10-րդ հոդվածի համաձայն արված յուրաքանչյուր հայտարարության մասին, եվ

ե. սույն Արձանագրությանը վերաբերող ցանկացած այլ գործողության, ծանուցման կամ հաղորդագրության մասին։

Ի հավաստումն որի՝ պատշաճ կերպով լիազորված ներքոստորագրյալներն ստորագրեցին սույն Արձանագրությունը։

Կատարված է Ստրասբուրգում 2013 թվականի հոկտեմբերի 2-ին, մեկ օրինակով, անգլերեն և ֆրանսերեն երկու հավասարազոր տեքստերով, որոնք պահվում են Եվրոպայի խորհրդի արխիվում։ Եվրոպայի խորհրդի Գլխավոր քարտուղարը հաստատված պատճեններն ուղարկում է Եվրոպայի խորհրդի անդամ յուրաքանչյուր պետության և Կոնվենցիայի այլ Բարձր պայմանավորվող կողմերին։