როგორ დაუკავშირდეთ სასამართლოს დროებითი ღონისძიების შესახებ მოთხოვნის წარსადგენად

დროებითი ღონისძიებების შესახებ მოთხოვნებს სამდივნოს თანამშრომლები იღებენ ორშაბათიდან პარასკევის ჩათვლით, დილის 8 საათიდან საღამოს 4 საათამდე (სტრასბურგის ადგილობრივი დროით). საღამოს 4 საათის შემდეგ მიღებული მოთხოვნები იმავე დღეს არ განიხილება. შაბათ-კვირას და საჯარო დღესასწაულების დღეებში მიღებული მოთხოვნები ამ დღეებში არ განიხილება; ისინი მუშავდება მომდევნო სამუშაო დღეს (იხ. საჯარო და სხვა დღესასწაულების სია).

მოთხოვნები უნდა გაიგზავნოს ECHR Rule 39 Site-ის მეშვეობით, ფაქსით ან ფოსტით. სასამართლო არ განიხილავს ელ-ფოსტით გაგზავნილ მოთხოვნებს.

– ECHR Rule 39 Site-ის მეშვეობით: ვებმისამართია https://r39.echr.coe.int. დამატებითი ინფორმაციისთვის იხილეთ ქვემოთ.

– ფაქსით: ფაქსით: მოთხოვნების გასაგზავნად განკუთვნილი სპეციალური ნომრებია: +33 3 90 21 43 50 და +33 3 88 41 39 00. რეკომენდებულია 10 გვერდზე მეტი მოცულობის ფაქსების რამდენიმე ნაწილად გაგზავნა, რათა მათი მიღება და დამუშავება საუკეთესო პირობებში იყოს შესაძლებელი.

– ფოსტით:

European Court of Human Rights
Council of Europe
67075 STRASBOURG CEDEX
FRANCE

ფაქსით ან ფოსტით გაგზავნილი ყველა მოთხოვნის პირველ გვერდზე, გამუქებული შრიფტით, უნდა მიეთითოს შემდეგი:

„Rule 39 – Urgent საკონტაქტო პირი (სახელი და საკონტაქტო მონაცემები): …“

გაძევების ან ექსტრადიციის საქმეებში ასევე უნდა მიეთითოს შემდეგი:

„გადაყვანის დაგეგმილი თარიღი და დრო და დანიშნულების ადგილი: …“

მოთხოვნები, როგორც წესი, საბოლოო შიდასახელმწიფოებრივი გადაწყვეტილების მიღების შემდეგ რაც შეიძლება მალე უნდა იყოს მიღებული, რათა სასამართლოსა და მის სამდივნოს საკითხის განსახილველად საკმარისი დრო ჰქონდეთ. გაძევების ან ექსტრადიციის საქმეებში სასამართლომ შეიძლება ვერ განიხილოს მოთხოვნები, რომლებიც გადაყვანის დაგეგმილ დრომდე ერთ სამუშაო დღეზე ნაკლები დროით ადრე მიიღო.

ECHR Rule 39 Site-ის მეშვეობით მოთხოვნების წარდგენის დეტალები

ECHR Rule 39 Site-ი გამოიყენება მხოლოდ სასამართლოს რეგლამენტის 39-ე მუხლის საფუძველზე სასამართლოში დროებითი ღონისძიებების შესახებ მოთხოვნების წარსადგენად. მასალები, რომლებიც დროებითი ღონისძიებების შესახებ მოთხოვნებს არ ეხება, არ განიხილება, ხოლო ასეთი მოთხოვნები ამ საიტზე დაუყოვნებლივ დაიხურება.

საიტი გამოიყენება იმ მომჩივნებთან მიმოწერისთვის, რომლებმაც მოთხოვნები ამავე საიტის მეშვეობით წარადგინეს, დროებითი ღონისძიების შესახებ მოთხოვნაზე გადაწყვეტილების მიღებამდე. საიტის მეშვეობით გაგზავნილი კორესპონდენცია, მათ შორის ნებისმიერი ადმინისტრაციული ან სასამართლო გადაწყვეტილების შეტყობინება, ჩვეულებრივი ფოსტით არ გაიგზავნება. სასამართლო საიტს არ გამოიყენებს იმ მომჩივნებთან დასაკავშირებლად, რომლებმაც მოთხოვნები სხვა საშუალებებით, კერძოდ, ფაქსით ან ფოსტით, წარადგინეს.

მოთხოვნების წარსადგენად მომჩივნებმა უნდა შეასრულონ შემდეგი სავალდებულო მოქმედებები:

• შეავსონ ველი „მოთხოვნის სათაური (ამ ველში მომჩივნებმა მოკლედ უნდა განმარტონ თავიანთი მოთხოვნების საგანი)“

• შეავსონ მომჩივნებთან, წარმომადგენელთან და შესაბამის სახელმწიფოსთან დაკავშირებული ველები

• წარადგინონ სულ მცირე ერთი დანართი. ყველა დანართი უნდა იყოს PDF ფორმატში. დოკუმენტის ფორმატისა და ზომის მოთხოვნების შესახებ მეტი ინფორმაცია მოცემულია წესებსა და პირობებში (Terms and Conditions).

მნიშვნელოვანია

დროებითი ღონისძიების შესახებ მოთხოვნის წარდგენის შემდეგ მომჩივნებს დამატებითი ინფორმაციის ან დოკუმენტების ECHR Rule 39 Site-ის მეშვეობით გაგზავნა მხოლოდ იმ შემთხვევაში შეუძლიათ, თუ სასამართლო მათ ამას მოსთხოვს.